PERSÓNUR OG LEIKMYNDIR

Þar sem engar myndir er að finna frá sögulegum tíma er eingöngu stuðst við lýsingar í fornum ritum. Þegar svipmikil manneskja sem líkist rituðum lýsingum er fundin er tekin afsteypa af viðkomandi og hún steypt í silikon.

Að því loknu er andlitið málað og hárum stungið í afsteypuna, hár fyrir hár. Þannig hafa verið skapaðar nánast lifandi eftirmyndir af fólki og þær settar í hlutverk sögufrægra persóna.

Fatnaður, vopn og hversdagslegir hlutir eru þar að auki búnir til með aðferðum forfeðra okkar með það að sjónarmiði að allt í safninu verði sem upprunalegast. Þannig eru vopnin slegin til, ull og hör lituð með náttúrulegum efnum og tréhlutir látnir veðrast með eðlilegum hætti.

Á safninu er sýnt myndband um gerð safnsins og þær aðferðir sem hafa verið notaðar við gerð þess.